Dhea

今朝Day3見Dr So，照完陰超，得3粒，已經好冇心機，蘇醫生於是建議我食dhea（弱雄激素）每日3次，每次一粒（25mg)，即一日共食75mg，一般要食夠3個月先見效。蘇醫生話系美國黎講呢隻藥其實系健康食品，只要一日唔超過100mg，基本上系安全，但系有啲人可能都會產生副作用（唔記得系乜）。其實我較早兩次見面時都有問使唔使食，當時蘇醫生話證據好薄弱，因為進行相關研究嘅對象太少，所以食黎冇用。但今次蘇醫生話既然有人真系因為食左呢隻藥有所改善，叫我不妨一試，否則可能要考慮捐卵。呢一刻，真真正正感覺到要面對卵巢早衰呢個事實。雖然蘇醫生話捐卵只有自己知道，接生嘅醫生系唔會知的，但試問一個女人又邊想自己個肚系自己老公同第二個女人嘅結晶品吖。
宜家只好keep住食，M到就返蘇醫生度再照過。。。
臨出門口前，我問蘇醫生宜家應該食400定800mcg嘅葉酸，蘇醫生明確咁話既然都計劃緊隨時懷孕，最好食800mcg，如果唔系400mcg已經足夠。

飯桶

唔經唔覺，飲左中藥超過三個月了〜仲記得第一日睇完何醫師嘅時候，嗰度有位副醫師同我講，若果想將來大住個肚都可以健步如飛，咁就最好一日三餐都系食飯。原因系我啲氣唔夠，而且個人成日都好容易覺得攰。。。
副醫師仲話要做到三餐都系飯，唔容易架（真系好難＞＜），所以最好嘗試由中午同夜晚嗰兩餐着手開始。不過有陣時一大班人一齊食飯真系就唔到咁多，少食一餐半餐，我唸影響唔系咁大，不過當然希望自己可以全力以赴啦XP

最近終於加入第三餐喇〜早餐食飯，咁大個女真系第一次囉，頭兩日都覺得有啲新鮮感，點知過多兩日就有啲難受，直頭見到都唔想食添。不過好彩，問左醫師可以食泡飯，多一個選擇又真系唔錯，起碼唔使乾咽！唔講唔知，原來醫師食左四十幾年飯喇（當然系指三餐都系啦）真系可以用一個字形容：勁！！！聽完之後，我突然覺得好似我呢啲選擇性困難嘅人黎講，反而系件好事，起碼入到茶餐廳，唔使scan哂成張餐單，浄系睇飯類或時日午/晚餐。。。簡直系快、靚、正XD。以後就唔使再比老公話佢叫啲嘢黎左，而我仲未決定到。。。不過，要出街食有飯嘅早餐就真系難左啲。唔系餐蛋公仔面，就系奶油多或三文治，所以呢餐盡量都會留系屋企食。宜家都系專心調理好身體先。

荃灣龍母廟

11月1日今早見完Dr So後，我就自己一個出發前往龍母廟，系荃灣街市買左花、生果、香同打火機後，就系千色店後面搭81小巴（好似$4.5），系上角山路路口落車後沿路直上，行5分鐘後見到有個龍母廟指示牌，沿右斜坡上多5分鐘就見到龍母廟喇。

沿途將帶去嘅香上比諸位菩薩，上到去後就同右面殿內的蘭姑買份衣紙（$22）跟住將所有香點着，中間香爐上5枝，其餘香爐全部3枝。之後點着一對蠟燭，跟住就「褶」衣紙，再將成份衣紙攞去龍母娘娘同觀音娘娘，金花娘娘面前跪拜。講自己姓乜，名乜，幾歲（今日唔記得講T.T）住邊同心願。然後化左去（我見到BK講嘅蘇伯，系佢話比我知要去邊度化左佢,thx~）。

原本唸住同蘭姑講想摸龍床，但揾唔到佢，於是我就自己上樓上，嗰度有位叫根嫂的姨姨就開門比我入去摸龍床。入房後首先同龍母娘娘許願，然後扣三個響硬，就伸手抽摸龍床裏面的利是（根嫂話抽之前要「洗」一「洗」先）我抽到「得心應手」，根嫂就問我求咩？（眼淚就失控同佢講求生b)系咪抽到自己想要嘅嘢？（系呀），然後叫我代老公跪拜多次龍母娘娘（要講先生個名同心願），再幫老公抽一個，就抽到「有求必應」，根嫂再問系咪自己想要嘅嘢（系呀），點知根嫂叫我將自己抽到嘅「得心應手」放返入去，然後再抽多一次，今次抽到添丁發財（仲開心呀，希望可以成真啦）。最後根嫂叫我添十蚊香油，我就比左廿蚊，我問根嫂洗唔洗幫老公添埋一份（佢話你地兩個一家人，一份就夠），之後根嫂話啲善信通常都系過年嘅時候黎參拜，仲話若果今次成功就3個月後黎揾珍姑作六甲福；唔得就要明年年初一過後一個月內再去參拜多一次。臨走前根嫂仲帶我去太歲殿點香。

仲有呀，根嫂話五月初八系龍母娘娘生日，到時會好熱鬧好多人去參拜架！

中醫覆診@10/30

上個星期因為醫師請假，所以中間10/22配左一次中藥(兩劑)。今日覆診一見醫師當然即刻問佢請假去邊度玩啦〜原來佢去左武漢參加籃球比賽，仲系70歲組別到攞到冠軍添，真系好勁呀。。。醫師佢好好人，仲比攞到獎嘅相我睇添，佢着住套比賽運動服時真系英姿勃勃，唔知何太系咪咁追到手呢~嘿嘿♪♪♪聽完之後我都覺得好自豪呀，因為我睇緊嘅醫師系文武雙全架，yeah(^O^)

膀胱炎

今朝膀胱感覺最差，於是打左電話去泌尿科中心，姑娘話馬醫生放緊假，最快都要22號返，雖然嗰度仲有4〜5個醫生可揀，但我唔知揀邊個好，姑娘就叫我返去留小便同做快速測試。

下午到達後，容姑娘（應該系專責馬醫生嘅姑娘）幫我啲vv用左快速測試，證實有小量白血球，跟住就話要將啲小便送去化驗，睇吓入面系咩菌，先可以對證下藥喎。結果要下星期二先知，叫我暫時飲多啲水，可舒緩病情。仲話我反證都挨左5日，唔爭在等吓。真無奈=.=今日埋單$300化驗費。

排卵日

今日下午456點左右（確實時間真系唔記得左），右邊腹部開始痛，一直痛到晚上10點半多，越夜腹部就越痛，仲攪到個人好攰好眼訓，連力都唔想出。心唸要排卵喇，老公仲唔快啲返黎交功課（≧∇≦）醫師叫我地要努力做功課架。。。

差不多11點，返黎喇，等到人地條頸都長喇。之前三個月都系左邊，難得今次系右邊仲唔嗱嗱臨。不過，我都有啲擔心，因為以前左邊排會痛，右邊一系唔痛，一系得少少yuen痛，但今次就好明顯，希望唔系朋友所講嘅不通則痛啦。

中醫覆診@10/9

今日第一次早上去睇醫師，以前通常都系㨂下午去睇佢。可能因為太晏，攪到每次返到屋企都要拿拿臨煲藥，有時飲完成碗藥後，攪到飽得滯冇乜胃口食晚飯，所以唸唸吓都系試吓改朝早去睇佢啦。。。

今日醫師問我點樣呀？我話ok呀，今日day12，宜家等緊排卵。佢就問我啱啱呢次黎m嘅時候痛唔痛呀？我話以前多數系左邊yuen痛，但今次系中間喔（其實上次佢問我嘅時候，我講過一次喇）跟住我即刻同佢講我跑左5日步呀。佢就笑笑口話好吖。跟住就問我夜晚訓得好嗎？我就話可能日頭跑完步，所以夜晚都幾好訓。接住醫師就話仲有啲咩呀？我話系甘多喇。。。點知醫師即系話仲要努力先得架？！跟住就話開啲加強有b嘅藥比我。。。唔知系咪即系要我地比心機做功課呢XD。

P.S.今朝睇中醫時再次見到我第一次到嘉寧睇症時嘅大肚女仔，個肚睇落應該都有7、8個月，個女仔似系一直都有keep住睇何醫師。唔知佢之前系咪同我地好多人一樣都系經歷過辛路歷程先成功有b呢？如果可以分享吓咁就好喇。